“Bələdiyyələrin fəaliyyətində gənclərin rolu”

09 fevral 2011-ci il tarixdə  İmişli İcma Məlumat Mərkəzində “Bələdiyyələrin fəaliyyətində gənclərin rolu” mövzusunda seminar tədbiri keçirildi.
Tədbirdə İmişli şəhər bələdiyyəsinin, “RƏMZİ” Gənclər Bələdiyyəsinin, İmişli Təhsil Şöbəsinin, Cəfərli kənd bələdiyyəsinin, “ARAZ” HTİB-in, “İNKİŞAF 2006” QHT-nin nümayəndələri, İmişli İcma Məlumat Mərkəzinin istifadəçiləri olmaqla 33 nəfər iştirak edirdi.

Tədbiri giriş sözü ilə İmişli İcma Məlumat Mərkəzinin administratoru Əbülfət Zeynallı açdı. O, tədbirin məqsədi barədə qısa açıqlama verdikdən sonra Bələdiyyələrin fəaliyyətində gənclərin rolu-gənc bələdiyyə üzvləri barədə bəzi statistik rəqəmləri iştirakçıların nəzərinə çatdırdı. Həmçinin o,  qeyd etdi ki gənclərin fəaliyyəti təkcə bələdiyyə üzvlüyü ilə bitmir. Bələdiyyə üzv olmayan gənclər də öz təklif və fikirlərinin fəaliyyətdə olan bələdiyyələrə təqdim etməklə bələdiyyələrin fəaliyyətinə müsbət təsir göstərə bilərlər. Bundan sonra o çıxış üçün sözü “RƏMZİ” bələdiyyəsinin rəhbəri Tural Babaşova verdi. Tural müəllim çıxışında “RƏMZİ” Gənclər Bələdiyyəsinin fəaliyyəti barədə məlumat verdi. O, bildirdi ki gənclər bələdiyyəsi yarandığı az müddətdə müstəqil olaraq əhali arasında rəy sorğuları keçirməklə əhalinin ehtiyaclarını müəyyənləşdirir və bu nəticələri Yerli özünüidarə orqanlarına, İcra Hakimiyyətinə, yerli mətbuata təqdim etməklə bir növ bu ehtiyaclara daha çox diqqət ayrılmasına nail olur. Gənclər Bələdiyyəsinin digər üstünlüyü ondadır ki, bu bələdiyyədə gender balansı da qorunur. Bu bələdiyyədə müstəqil olaraq  qızlar da fəaliyyət göstərir ki, bu da regionda qızların aktivliyini artıran bir fəaliyyətdir.

Növbəti çıxışda  “İNKİŞAF 2006” Təşkilatının icraçı direktoru Füzulu Abıyev Yerli Bələdiyyələri gənclərin də təkliflərini nəzərə almağa çağıraraq qeyd etdi ki, gənclər bizim gələcəyimizdir. Biz istəsək də, istəməsək də gələcək onlarındır. Yaxşı olar ki, biz indidən onları müstəqil fəaliyyətə hazırlayaq. Daha sonra Təhsil Şöbəsinin nümayəndəsi inspektoru Əlsalam Həsənov, İmişli Əhalinin Sosial Müdafiəsi İdarəsinin nümayəndəsi Mehdi Əhmədov, Cəfərli kənd bələdiyyəsinin üzvü Əlizadə Muğan çıxış edərək gəncləri bələdiyyələrin fəaliyyətində yaxından iştirak etməyə çağırdı.

Tədbirin sonunda İmişli İcma Məlumat Mərkəzinin administratoru Əbülfət Zeynallı tədbirdə iştirak edənlərə bir daha təşəkkür edərək iştirakçıları maraqlandıran suallara cavab verdi. Öz növbəsində iştirakçılar da mövzunun bu günümüz üçün çox aktual olduğunu bildirərək İmişli İcma Məlumat Mərkəzinə, İREX/Azərbaycan təşkilatına öz minnətdarlıqlarını bildirdilər.